Federata Belge e Futbollit ka vendosur të zgjatë edhe për dy vite kontratën me trajnerin e përfaqësueses Roberto Martinez. Vetëm pak javë para startit të Botërorit “Rusi 2018”, qeveria e futbollit në Belgjikë është bindur plotësisht se spanjolli është njeriu i duhur për t’i udhëhequr “Djajtë e Kuq” drejt finaleve të “Euro 2020”.
Martinez e mori detyrën pas finaleve të “Euro 2016”, duke e drejtuar me sukses dhe autoritet skuadrën në eliminatoret e Botërorit. “Djajtë e Kuq” në 10 ndeshje kualifikuese arritën të fitonin 9 dhe barazonin vetëm një takim, duke siguruar kualifikimin si të parët e grupit. Belgjika është një nga përfaqësueset me talente të jashtëzakonshme në përbërje, si Courtois, Lukaku apo Hazard, dhe shihet si skuadra që mund të bëjë surprizën në “Rusi 2018”.
