Tirana ka fituar edicionin e 72-të të Kupës së Federatës në Volejboll për femra duke mundur Partizanin 3-1 me sete. Ndeshja u zhvillua në palestrën sportive “Feti Borova” dhe ishte mjaft e luftuar, veçanërisht në dy setet e para.
Seti i parë u mbyll në favor të vajzave të Tiranës, ndërkohë që skuadra e Roland Tares u kundërpërgjigj duke fituar në setin e dytë dhe barazuar rezultatin. Gjithsesi, dy setet e tjera, vajzat e ekipit të Tiranës i dominuan dhe arritën të fitojnë më me lehtësi.
Ky është trofeu i parë i këtij sezonit të ri të volejbollit për femra, kampionati i të cilit do të fillojë më 7 tetor.Tirana e Gorenzës kishte mundur kampionet e Marin Barletit për të mbërritur në finale dhe kishte një plus më shumë në letër, ndërkohë Partizani e pati më të lehtë, pasi kaloi Teutën për të mbërritur deri këtu.