Gola dhe spektakël në dy sfidat që hapën javën e 20-të të Kategorisë Superiore. Fitore e madhe me përmbysje e Skënderbeut në transfertën e Kamzës ndërkohë që në takimin tjetër Luftëtari i fali një pikë Laçit pasi shumë pranë fitores.
Problemet jashtë fushe nuk ndikuan aspak te Skënderbeu që në Kamëz u konfirmua si skuadra më e fortë e kampionatit. Dygolëshi i parë i Emiljano Vilës me fanellën e skuadrës korçare bëri të pavlefshëm perlën e Realdo Filin me Skënderbeu që triumfoi 2-1 me përmbysje ndaj skuadrës nga periferia e kryeqytetit duke regjistruar fitoren e parë ndaj Kamzës në këtë kampionat pas 2 fitoreve radhazi.
Në minutën e 12-të Fili ish lojtari i Partizani i cili mund të konsiderohet edhe si afrimi i bujshëm i Kamzës në merkaton e janarit mposhti Shehin me një goditje spektakolare nga limitet e zonës duke kaluar në epërsi skuadrën e Ndreut. Skënderbeu u përpoq të reagonte por në pjesën e parë nuk arriti të shkonte te goli. Megjithatë për të barazuar fillimisht shifrat dhe për të përmbysur më pas rezultatin mendoi një tjetër ish lojtar i Partizanit, Emiliano Vila i cili mposhti 2 herë Gjonikajn duke i dhënë fitoren formacionit të Ilir Dajës. Sukses ky që e ngjiti Skënderbeun në kuotën e 46 pikëve i shkëputur në krye të klasifikimit.
Prodhoi pothuajse gjithçka sfida që u zhvillua në Kurbin mes Laçit vendas dhe Luftëtarit. 4 gola 2 kartonë të kuq, një gafë e rëndë e portierit Ruçi dhe nga një pikë për të dyja skuadrat me bardhezinjtë e bluzinjtë që u ndeshën për herë të tretë në harkun e pak ditëve. Goli i shpejtë i Vasil Shkurtajt i cili vallëzoi mes mbrojtësve vendas, kartoni i kuq i Fangajt dhe finalizimi nga distancë i Rrocës në fillimin e pjesës së dytë krijuan përshtypjen e një fitoreje të lehtë të Luftëtarit në këtë transfertë të vështirë.
Por edhe në disavantazhin e 2 golave, me një lojtar më pak dhe pa sulmuesin kryesor Reginaldo në fushë, Laçi i Gentian Mezanit gjeti forcën për të reaguar, duke ndëshkuar skuadrën e Likës fillimisht me Shtubinën në të 52-ën dhe më pas gafa e Ruçit që solli golin e Nikës në të 64-ën, me Laçin që i rrëmbeu një pikë Luftëtarit që gjithashtu e mbylli ndeshjen me një lojtar më pak pasi disa sekonda pas golit të barazimit Aleksi mori kartonin e dytë të verdhë për protesta duke barazuar forcat në fushë. Deri në fund sfida nuk prodhoi më asnjë gol me dy skuadrat që ndanë nga një pikë në këtë përballje.
