Skena e futbollit kosovar rikthehet të mërkurën me ndeshjet gjysmëfinale të kthimit të Digitalb Kupës së Kosovës. Vëllaznimi dhe Drenica do të jenë edhe një herë përballë njëra – tjetrës në derbin e madh të skuadrave kuqezi. Prilli ka qenë muaji kur këto dy skuadra janë takuar dy herë dhe ndeshja e së mërkurës do të jetë përballja e tretë mes këtyre dy skuadrave të njohura të futbollit kosovar.
Vëllaznimi e ka përparësinë e terrenit vendës dhe pritet që stadium i qytetit në Gjakovë të jetë plot e përplot me tifozë.
Arsim Gojani i ka në dispozicion të gjithë futbollistët dhe të mërkurën do të tentojë që Vëllaznimit t’ia sigurojë finalen e madhe. Gjakovarët hyjnë në këtë ndeshje pas barazimit 1-1 nga ndeshja e parë dhe në njëfarë mënyrë kanë një lloj përparësie ndaj Drenicës, edhe pse në ndeshjet për Kupë shpesh ndodhin befasi të mëdha.
E gatshme është edhe Drenica e cila të mërkurën në Gjakovë do të udhëtojë e kompletuar dhe në kampin kuqezi të Drenicës janë optimistë se do ta arrijnë finalen e madhe.
Vëllaznimi kërkon finale për herë të katërt në histori të klubit. Gjakovarët trofeun e dytë më të rëndësishëm në Kosovë e kanë fituar vetëm një herë kur në finalen e vitit 2008 mundi Trepçën ’89 2-0. Megjithatë ata kanë qenë në finale edhe dy herë të tjera. Në vitin 1994 Vëllaznimi kishte humbur në finale nga Prishtina 2-1, derisa në vitin 2010 humbi me të njëjtin rezultat nga Liria.
Në anën tjetër Drenica kurrë nuk e ka fituar Kupën e Kosovës, derisa në finale ka qenë vetëm një herë. Ishte viti 2006 kur kuqezinjtë nga Skënderaj kishin humbur 5-4 me penallti nga Prishtina.
Derbi i skuadrave kuqezi pritet të sjellë spektakël në stadiumin e qytetit në Gjakovë, që do të jetë i mbushur deri në vendin e fundit. Të dyja këto skuadra ende nuk e kanë siguruar mbijetesën në Vala Superligën e Kosovës, por të mërkurën njëra nga to do ta prekë finalen e madhe të Digitalb Kupës së Kosovës për të kërkuar më pas edhe depërtimin në arenën ndërkombëtare.
Vëllaznimi – Drenica luhet të mërkurën me fillim nga ora 15:00 dhe transmetohet direkt në Supersport dhe Supersport Kosova.
Ndërkohë pasdite e tërë Vushtrria do të mundohet të gjejë një vend në stadiumin “Fërki Aliu” për të përcjellë ndeshjen kthyese gjysmëfinale të Digitalb Kupës së Kosovës në futboll.
Disfata nga skuadra më e madhe kosovare FC Prishtina prej 1-0, i jep një rast të mirë vushtrriasve që ta përmbysin epërsinë e kryeqytetasve dhe të kualifikohen për herë të parë në histori të klubit në finalen e madhe.
Optimizmi tek lojtarët dhe tifozët vushtrrias është i lartë dhe real, pasi të gjithë besojnë në përmbysje dhe fitore ndaj Prishtinës që udhëtim e favorizuar pavarësisht epërsisë minimale nga dueli i parë.
Derisa Prishtina do të jetë e kompletuar për këtë ndeshje, nga ana tjetër në dyshim mbetet inkuadrimi i sulmuesit kryesor të Vushtrrisë, Labinot Osmani, i cili pësoi lëndim në nyjën e këmbës në ndeshjen e fundit kampionale ndaj Ramiz Sadikut, por krejt varet nga ai dhe trajneri Isa Sadriu nëse do të inkuadrohet në lojë, për faktin se në fundjavë Vushtrria e luan ndoshta ndeshjen vendimtare për rikthim në Vala Superligë, pasi udhëton te lideri i ligës së pare, Keku.
Prishtina ka qenë në tetë finale të Kupës nga edicioni 1991/92, prej të cilave i ka fituar pesë, kurse për Vushtrrinë do të ishte hera e parë që do të luante në një finale të madhe të Digitalb Kupës së Kosovës në futboll.
Ndeshja nis të mërkurën nga ora 15.00 dhe transmetohet direkt në Supersport.