Tottenham Hotspur planifikon rinovimin me “bomberin” Harry Kane, pasi sirenat që vijnë nga Madridi kanë nisur të shqetësojnë drejtuesit e klubit londinez. Pasi i ka rrëmbyer Bale dhe Modric, Reali shënjestron një tjetër lojtar të Tottenham dhe largimi i mundshëm i sulmuesit do të ishte një goditje e rëndë për skuadrën e Maurizio Pocchetinos.
Sipas mediave britanike, Tottenham synon t’ia dyfishojë pagën lojtarit të Anglisë. Aktualisht ai përfiton 6 milionë euro në sezon, por duke nisur që nga sezoni i ardhshëm, klubi do t’i ofrojë 12 milionë. I pari në radhë që mbështet këtë inisiativë është trajneri argjentinas që e konsideron Kane një pikë kyçe të skuadrës së tij. “Shpresoj që Kane të qëndrojë sa më gjatë në klubin tone, sepse ai është një lojtar që ka vazhdimësi dhe është i aftë të na ndihmojë me golat e tij. Një gjë të tillë do t’ia kërkojmë”.
Në këtë mënyrë, Reali i Madridit mund ta ketë shumë më të vështirë për ta blerë sulmuesin e “Tre Luanëve”, që e mbylli vitin si golashënuesi më i mirë në Europë për 2017-ën. Aktualisht, Tottenhami renditet në vendin e pestë të klasifikimit me 4 pikë më pak se Liverpooli dhe dështimi i misionit për të arritur zonën Champions mund ta komplikojë situatën, edhe pse në Londër duken të bindur për ta blinduar “xhevahirin” e tyre me një kontratë faraonike.
