Makthi “Wembley” nuk ekziston më për Tottenham Hotspur pasi në stadiumin mitik të kryeqytetit anglez, Spurs-at e Mauricio Pochettinos dërrmuan Liverpool-in e Jurgen Klopp. Në një ndeshje ku i ftuar special i Tottenham-it ishte legjenda e futbollit, argjentinasi Diego Armando Maradona, vendasit arritën të mposhtnin The Reds me rezultatin e thellë 4-1. Protagonisti kryesor i sfidës ishte sulmuesi i kombëtares angleze Harry Kane autori i një 2-golëshi. Rrugën e rrejtës për Spurs e gjetën edhe koreano-jugori Son dhe Dele Alli, ndërsa goli i vetëm i miqëve mban firmën e Salah.
Liverpooli pësoi një tjetër humbje të rëndë nga një skuadër e madhe në këtë sezon pas asaj disfate ndaj Manchester City-it. Thellohet kështu kriza e skuadrës së Klopp në Premier League me The Reds që nuk fitojnë prej 3 javësh ndërsa kanë arritur vetëm një sukses në 6-t ndeshjet e fundit. Në krahun tjetër Tottenham po kalon një moment të shkëlqyer pasi kjo ishte fitorja e 4-t rradhazi për londinezët në kampionat të cilët barazuan Manchester United në kuotën e 20 pikëve dhe numërojnë vetëm 5 pikë më pak se kryesuesit e Manchester City-it.