Kategoria e Parë

Tirana mposht 3-1 Tomorin, +10 pikë nga Bylisi

Tirana nuk njeh blof në ndeshjen hapëse të javës së 15-të të Kategorisë së Parë për Grupin B. Bardheblutë thyen 3-1 Tomorin në sfidën e zhvilluar në “Selman Stërmasi”, duke e çuar në 10 pikë diferencën me Bylisin, që udhëton për në Pogradec.

Skuadra e Ze Marias kaloi në epërsi që në minutën e 18-të me Ngoo, që realizoi nga pika e bardhë e penalltisë pas një prekjeje të topit me dorë brenda zonës së Tomorit.

Pa u mbushur gjysmë ore lojë, Kopaçi përftoi nga shpërqendrimi i bardhebluve dhe nga dalja e pastudiuar mirë e Likës, duke barazuar shifrat.

Vendasit e kthyen menjëherë epërsinë me Ngoo, që realizoi të dytin personal me një goditje të fortë dhe të saktë brenda zonës.

Golin e sigurisë për Tiranën e shënoi Greca në të 58-ën sërish me 11-metërsh.

Të dyja skuadrat e mbyllën takimin me nga 10 lojtarë. Në fund të pjesës së parë u ndëshkua me karton të kuq për protesta Kopaçi i Tomorit, ndërsa Marveje në të 73-ën.

To Top