Një turne ndërkombëtar si ata që rrallë shihen të organizohen në vendin tonë. “Tirana Challenge” ishte aktiviteti që mblodhi 500 sportistë nga nëntë shtete të ndryshme në kryeqytet. Garuesit nga Shqipëria, Kosova, Gjermania, Italia apo Mali i Zi e Greqia konkurruan në të gjitha moshat dhe kategoritë e ndara sipas rripave të mjeshtërisë në zotërimin e kësaj disipline.
E jashtëzakonshme të shihje impenjimin dhe shpirtin luftarak të shfaqur nga më të vegjlit dhe lumturinë në momentin e vlerësimit me medalje, por edhe cilësinë e dueleve tek më të rriturit. Aktiviteti në të cilin ishin të pranishëm krerët e Komitetit Olimpik Shqiptar dhe Federatës Shqiptare të Taekwondo, u cilësua një sukses nga organizatori, mjeshtëri Julian Caca.
Pjesëmarrja masive në turneun ndërkombëtar “Tirana Challenge” konfirmoi edhe një herë përhapjen masive të disiplinës së Taekwondo tek fëmijët dhe të rinjtë në Shqipëri, si një mënyrë për të praktikuar sportin duke mësuar disiplinën dhe vetëmbrojtjen.