Situatë aspak e qetë te Juventusi vetëm 3 ditë përpara sfidës shumë delikate ndaj Interit në Serinë A, përballje që mund të vendosë edhe fatet e titullit kampion. Paraditen e sotme futbollistët e Juves po kryenin seancën e radhës stërvitore për ndeshjen e të shtunës. Por jashtë qëndrës stërvitore në Vinovo është parë një grup i madh tifozësh ultras të bardhezinjëve të cilët kanë kontestuar ashpër skuadrën për paraqitjen e të dielës së kaluar ndaj Napolit, madje duke përdorur edhe fjalë fyese ndaj lojtarëve. Grupi i tifozëve që kishte mbrritur në Vinovo ka kërkuar shpjegime dhe një përballje me skuadrën. Fillimisht kapiteni Buffon dhe më pas mesfushori Marcchisio kanë biseduar me disa prej tifozëve duke u shpjeguar edhe faktin se përse futbollistët e Juventusit nuk shkuan të përshëndeteshin me tifozët ultras në përfundim të sfidës ndaj Napolit. Megjithatë pavarsisht momentit delikat që po kalon, Juvja mund të mbështetet akoma te fansat e saj të cilët në kangjellat e qëndrës stërvitore kishin vendosur edhe një banderolë me mbishkrimin; Ne me zë, ju me zemër, të fitojmë!
