Vllaznia shkon në sprintin final të sezonit në gjendjen më të mirë të mundshme, pasi trajneri Ernest Gjoka ka në dispozicion të plotë grupin dhe në një gjendje fizike dhe psikologjike të jashtëzakonshme. Kuqeblutë, më në fund, duket se kanë rigjetur sulmuesin pas disa sezonesh vuajtje. Dhe jo një, por dy goleadorë të skuadrës së drejtuar nga Ernest Gjoka gëzojnë formën optimale. Pa u ndier Xhevahir Sukaj, që është kthyer në simbolin e tifozërisë vendase, ka shkuar në kuotën e 8 golave dhe me ritmin aktual nuk është çudi që në javët e fundit të jetë një pretendent për Këpucën e Artë.
30-vjeçari e ka kthyer në modë që kur shënon në një ndeshje për Vllazninë ta bëjë me dy realizime, pasi ndaj Lushnjës është 2-golëshi i 3-të sezonal me shkodranët, dy herë ndaj Lushnjës dhe një herë ndaj Flamurtarit. Në mungesë të tij repartin e avancuar e ka udhëhequr vlonjati Andi Ribaj, që ka shënuar 4 gola këtë edicion, realizime me peshë që kanë ndihmuar Vllazninë në marrjen e rezutlateve pozitive. Sa herë që ish-sulmuesi i Apolonisë ka shënuar, Vllaznia ka marë pikët e plota dhe ky është një tjetër tregues pozitiv për shkodranët.
Jo më kot “timonieri” i kuqebluve në sfidën e fundjavës së shkuar vendosi të luajë me dy sulmues, duke preferuar që nga minuta e parë Sukajn dhe Ribajn, një zgjedhje që rezultoi e goditur. “Xhevo” shënoi dy herë (goli i dytë ishte një eurogol) dhe në mës të tyre erdhi realizimi i vlonjatit Ribaj. Me këtë formë Vllaznia shkon me e qetë në sprintin final të sezonit, pasi golat janë të garantuar.
