Pasi mbajti në skuadër Enea Kolicin duke e blinduar portierin pogradecar me një kontratë të re, Kukësi ka bërë një tjetër goditje për portën pasi ka arritur marrëveshjen me Stivi Frashërin. Ish portieri i Flamurtarit ka firmosur për 2 vite me kampionët e Shqipërisë duke pranuar të jetë zëvendësi i Enea Kolicit njeriut që me pritjet e tij fantastike sezonin e kaluar udhëhoqi verilindorët drejt fitimit të titullit të parë kampion në historinë e klubit. Me afrimin e Stivit Frashërit, Kukësi tashmë do të ketë dy portierë të nivelit të lartë dhe e ka të sigurtë portën për sezonin e ri.
26-vjecari Frashëri në karrierën e tij ka luajtur me disa skuadra të njohura. Hapat e parë në karrierë gardiani korcar i ka hedhur te Bylis ku ka luajtur për 4 sezone nga 2010-ta në 2014-tën, ndërsa më pas ai bëri lëvizjen e madhe në karrierë duke u transferuar te Tirana. Me bardheblutë Frashëri u aktivizua për një sezon e gjysmë për tu rikthyer sërish te Bylis. Në sezonin e fundit Frashëri ishte pjesë Flamurtarit duke mbrojtuar ngjyrat e skuadrës vlonjate në 11 ndeshje të kampionatit. Tashmë për të nis një aventurë e re te skuadra kampione Kukësi.
