Massimo Oddo është emëruar trajner i Udineses në fillim të kësaj jave, ku ka zëvendësuar pikërisht Gigi Del Nerin, por duket se aventura e tij do të fillojë menjëherë me një ‘malore’ të fortë.
Udinese do të presë nesër në ‘Friuli’, kryesuesit e Serisë A, Napolin, që po luan një futboll fantastik, kohët e fundit. Këtë e pranon edhe vetë Oddo, që shprehet se skuadra e Sarrit është një prej më të fortave në botë dhe luan një futboll shumë të shpejtë.
“Presim një prej skuadrave më të forta në botë, që luan një futboll shumë të shpejtë dhe është e vështirë për t’u përballuar. Gjithsesi, ne jemi gati dhe do të kërkojmë maksimumin. Edhe nëse Napoli fiton, e sigurt është që do t’i duhet të djersijë shumë për këtë. Kam vërtetë respekt e vlerësim për skuadrën e Sarrit, por çdo ekip e ka një pikë të dobët. Nesër do të hedh në fushë formacionin më të mirë dhe kam besim se në fund të 90-minutëshit, do të dalim të pamposhtur”, tha trajneri i ri i Udineses, Massimo Oddo.
