Sulejman Starova optimist para takimit përmbyllës të javës së 14-të të Kategorisë Superiore me Teutën në “Selman Stërmasi”. Trajneri i të kuqve zbuloi se Bardhi është në dyshim për këtë ndeshje për shkak të një gjendjeje gripale, megjithatë kjo nuk do ta pengojë formacionit e tij të kërkojë maksimumin ndaj skuadrës së Maganit.
“Bardhi është duke kaluar një gjendje gripale dhe nesër do të marrim vesh nëse do të jetë i gatshëm. Rotacion nuk kam pse të bëj, nëse do të jetë, ose jo Bardhi. Një futbollist mund të zëvendësohet kokë për kokë. Nuk bëhet fjalë për rotacion. Teuta është një skuadër që ka pasur luhatje, por luan futboll të bukur dhe ka një nga trajnerët më të mirë në Shqipëri. Objektivi ynë është të fitojmë ndeshjen, ashtu siç e ka edhe Teuta. E parashikoj një sfidë të vështirë, ndaj lojtarët duhet të jenë të gatshëm për të fituar.”
Nga aktivizimi i Prognit sulmues i parë te gjendja fizike e Edgar Çanit, që sipas Starovës, nuk është gati për të luajtur te Partizani.
“Progni sulmues ka luajtur gjithë kohën. Ne kemi kënaqësinë që Progni ka ardhur në formën e vet. Është një lojtar që është rritur në akademinë e Partizanit dhe është rikthyer pas një ekskperience jashtë Shqipërisë. Edgar Çani? Ai nuk është i gatshëm për të luajtur futboll. Nuk mund të marrë ngarkesën si gjithë lojtarët e tjerë. Nuk bëhet fjalë të jetë pjesë e skuadrës me këtë gjendje që ka tani.”
Sa i përket hunagrezit Adorjan, Starova paralajmëroi që do të largohet nga të kuqtë nëse nuk pranon ulje të pagës.