Skënderbeu humbet testin e parë gjatë mini-fazës përgatitore që skuadra po zhvillon në Antalia. Kryesuesit e Kategorisë Superiore u thyen me rezultatin 3-0 nga Bursaspor-i, skuadër e Superligës turke, që është në garë për një vend në kupat e Europës.Trajneri Daja hodhi në fushë formacionin më të mirë, me përjashtim të Osmanit që u aktivizua në vend të Radas në mbrojtje dhe portierit Aldo Teqja që ishte titullar në vend të Orges Shehit, për të treguar se mund të jetë pasardhës i denjë i kapitenit.
Edhe Bursaspori aktivizoi lojtarët më të mirë, me ekipin turk që diminoi gjatë pjesës së parëm, duke krijuar mjaft raste për shënim, por mungesa e saktësisë përpara portës dhe ndërhyrjet e portierit Teqja në dy momente e mbajtën të paprekur rrjetën e Skënderbeut.Korçarët nga ana e tyre provuan, duke rrezikuar me Lilajn, Gavazajn dhe Vangjelin, por pa rezultat. Pjesa e dytë e lojës nisi në mënyrën më të keqe për të besuarit e Dajës, që në të 48-ën e panë veten në disavantazh, pas golit të Jusef Erdoan.
Pavarësisht 10 zëvendësimeve gjatë lojës, Skënderbeu provoi deri në fund të evitonte humbjen, por ndërsa skuadra ishte hedhur e gjithën në sulm, i krijoi kundërshtarëve hapësira, të cilat Bursaspor-i i shfrytëzoi. Sinan Bakësh në të 89-ën realizoi golin e dytë për turqit, ndërsa në minutën e tretë shtesë Kembo-Ekoko vulosi rezultatin përfundimtar 3-0 me penallti.