Skënderbeu ka bërë detyrën e tij në ‘Elbasan Arena’, teksa ka mposhtur 3-2 Dinamon e Kievit, por fitorja ka vlejtur vetëm për prestigj dhe për të mbushur arkat e klubit. Fitorja e Partizanit të Beogradit, 2-1 ndaj Young Boys-it, ka bërë që serbët të sigurojnë kualifikimin bashkë me Dinamon e Kievit dhe korçarëve nuk ju mbetet gjë tjetër, veçse të mbrojnë vendin e 3-të, më 07 dhjetor në Zvicër, ku do të diskutojë takimin e fundit të aventurës europiane për këtë sezon.
Korçarët e nisën vrullshëm takimin dhe vunë në vështirësi ukrainasit, por të parët që shënuan ishin këta të fundit. Nëpërmjet një daljeje të shpejtë, Dinamo e Kievit gjeti avantazhin, pas një aksioni mjaft të dyshimtë për pozicion jashtë loje. Gjithsesi, Skënderbeu u kundërpërgjigj menjëherë, duke barazuar me një supergol nga distance, të shënuar nga Sabien Lilaj. Në minutat në vazhdim, korçarët krijuan disa raste të mira, por i shfrytëzuan keq, ndërsa Dinamo e Kievit goditi traversën e portës së Shehit, pas një kundërsulmi të rrezikshëm.
Në pjesën e dytë, skuadra e Dajës futet më e motivuar në fushë dhe arrin të shënojë 2 gola të shpejtë. Fillimisht Sowe asistoi për Xhejms, që shënoi golin e avantazhit, dhe më pas ishte vetë sulmuesi nga Gambia, që shënoi golin e 3-të, pas një asisti perfekt të Gavazajt. Në minutat në vijim, trajneri Daja kryen zëvendësimet që kishte në dispozicion dhe Skënderbeu fillon të administrojë avantazhin prej 2 golash, duke qarkulluar topin dhe ndërtuar sulme graduale. Në minutën e 90’, ukrainasit përfitojnë nga një përgjumje e mbrojtjes korçare dhe arrijnë të rihapin sfidën, por 5 minutat shtesë nuk prodhuan asgjë për t’u shënuar.
Përfundoi 3-2 për Skënderbeun, me korçarët që më 07 dhjetor do të luajnë takimin e fundit në Europa League, për këtë sezon. Gjithsesi, ky mund të quhet një edicion mjaft i mirë për korçarët, që kanë ditur të përballen si të barabartë me të gjithë kundërshtarët e grupit B, ndërsa ndaj Young Boys-it do të kenë mundësi të regjistrojnë një tjetër rezultat pozitiv.
56’ – Sërish Skënderbeu, dyfishon avantazhin. Aksion mjaft i bukur i korçarëve, me Gavazajn që nxjerr sulmuesin Sowe, të vetëm me portierin, të cilin e driblon dhe dërgon topin në rrjetë.
52’ – Skënderbeu gjen avantazhin. Korçarët ekzekutojnë një goditje dënimi, me topin që grushtohet fillimisht nga portieri ukrainas, por Mici e rikthen sërish në zonë, aty ku Sowe e ul bukur për James, që e dërgon në rrjetë.
18’ – Kundërpërgjigjet menjëherë Skënderbeu. Sabien Lilaj barazon rezultatin, duke shënuar një gol fantastik, me një gjuajtje nga distance. Mesfushori tregon edhe një herë se është lider i Skënderbeut.
16’ – Dinamo e Kievit kalon në avantazh, nëpërmjet një aksioni shumë të dyshimtë, për pozicion jashtë loje.
Formacionet zyrtare:
Skënderbeu: Shehi, Radas, Aliti, Vangjeli, Mici, Osmani, Muzaka, Lilaj, Gavazaj, Xhejms, Sowe.
Dinamo Kiev: Bushchan, Shepeliev, Morozyuk, Moraes, Tsygankov, Korzun, Pivariç, Khacheridi, Besedin, Kadar, Kedziora.
18:30 – Gjithçka duket gati në ‘Elbasan Arena’, në pritje që të mbërrijnë futbollistët e të 2 ekipeve.
https://www.facebook.com/kfskenderbeu.al/videos/1529772993727083/