Sioni i Tramezzanit u mposht sot 0-1 nga Young Boys dhe tani stoli i ish ndihmësit të De Biasit është sërish në rrezik. Skuadra zvicerane nuk e kishte nisur aspak mirë sezonin, por fitorja në mesjavë, ndaj Luganos në transfertë, kishte sjellë qetësi në ambientin e klubit.
Javën e kaluar, Sion u eliminua nga Kupa e Zvicrës dhe presidenti i klubit vuri gishtin te trajneri italian, si përgjegjësi për rezultatet e dobëta dhe theksoi se nëse situata nuk ndryshon, do të detyrohet të marrë masa. Ende nuk dihet nëse presidenti i Sion do t’i japë sërish mundësin ish ndihmësit të De Biasit, të rikthejë ekipin në rrugën e duhur, apo do të vendosë ta largojë.
Tramezzani mori drejtimin e Sion në merkaton e verës, pas një gjysmë sezoni shumë të mirë nën drejtimin e Luganos, në gjashtë muajt e parë të vitit. Krahas shumë emrave të afruar në merkato, tekniku italian preferoi të ketë nën urdhrat e tij edhe dy futbollistët e kombëtares shqiptare, Lenjani dhe Kukeli.