Marash Kumbulla tashmë mund të konsiderohet si një prej lojtarëve më me përvojë te kombëtarja e 19-vjeçarëve, pasi ishte pjesë e ekipit të Erion Bogdanit dhe në eliminatoret e shkuara.
Në prag të dy ndeshjeve miqësore me Kazakistanin dhe përgatitjeve për eliminatoret e kësaj grupmoshe, Kumbulla shprehet i kënaqur nga fakti që në skuadër mbizotëron forca e grupit dhe këto teste do të shërbejnë për të përforcuar bashkëpunimin brenda kuadratit të gjelbër.
“Jemi grup shumë i bashkuar dhe kemi shumë kualitet. Do shohim tani çfarë do japim në fushë, në këto miqësore që kemi, për të parë se ku jemi”, tha Kumbulla.
Në eliminatoret e Europianit të 19-vjeçarëve, Shqipëria është shortuar bashkë me Ukrainën, Norvegjinë dhe Sllovakinë. Për Kumbullën këtë herë objektivi do të jetë kalimi i këtij raundi.
“E dimë se kemi një grup shumë të vështirë, por objektivi është për t’u kualifikuar, sepse vetëm kështu mund të ecet përpara”, tha futbollisti i kombëtares U-19.
Sa i përket të ardhmes së tij te Verona, mbrojtësi bëri të ditur se dëshira është grumbullimi me ekipin e parë dhe për këtë po punon dita ditës.
“Unë tani luaj me skuadrën e të rinjve te Verona, por stërvitem shpesh edhe me ekipin e parë, ndaj po pres me padurim edhe grumbullimin e parë”, deklaroi Kumbulla.
