Një penallti në minutat e fundit ndëshkoi Shqipërinë e 17-vjeçarëve. Skuadra e drejtuar nga Xhemal Mustedanagic edhe pse zhvilloi një ndeshje shumë të mirë u mposht me rezultatin 0-1 nga Kroacia në stadiumin “Selman Stërmasi”, në sfidën e parë të grupit 2 kualifikues të Europianit të 17-vjeçarëve. Në pjesën e parë kuqezinjtë e vegjël u vunë në vështirësi serioze nga kroatët të cilët goditën edhe shtyllën në minutat e para.
Megjithatë Shqipëria U-17 e rriti ndjeshëm nivelin e lojës së saj në pjesën e dytë duke iu afruar golit të avantazhit në disa raste. Por në momentin më të mirë të kuqezinjëve qëndërmbrojtësi Smajlaj pengoi brenda zone Marin në minutën e 78-të, me gjyqtarin që akordoi 11-metërsh për miqtë. Nga pika e bardhë e penalltisë Krizmanic mposhti portierin Malaj për t’i dhënë 3 pikët e para Kroacisë në grupin 2. Ndeshjen tjetër Shqipëria U-17 do ta ketë ndaj Spanjës në datën 22 tetor.
