Sfida e mbrëmjes në ‘Loro Boriçi’, do të jetë mjaft e veçantë, jo vetëm për tifozët shqiptarë, por edhe për trajnerin Panucci, i cili do të përballet me vendin e tij. Gjithsesi, ky fakt duket se e ka motivuar më shumë trajnerin e kombëtares shqiptare, që të kërkojë maksimumin përballë italianëve.
Këtë e pranoi edhe vetë Panucci, kur tha se Sadikun dhe Agollin i la në stol ndaj Spanjës, për t’i pasur të gatshëm kundër Italisë. E ndërsa sfida po afron, duket se trajneri e ka ndarë mendjen edhe për formacionin që do të hedhë në fushë dhe pritet t’i rikthehet rreshtimit 4-5-1, aq shumë të përdorur edhe nga De Biasi.
Kështu në portë do të jetë si zakonisht Berisha, ndërsa në mbrojtje do të rikthehet Mavraj, t’i bashkohet Ajetin në qendër, Hysaj në të djathtë dhe Agolli në të majtë. Në mesfushë konfirmohet si titular Ergys Kaçe, që e justifikoi tërësisht besimin e trajnerit në Spanjë, ndërsa në krah të tij pritet të luajë Migjen Basha. Dilema e vetme e trajnerit duket të jetë ajo mes Ahmedit dhe Memushajt, me vlonjatin më të favorizuar, ndërsa nga krahët do të luajnë Roshi dhe Grezda, në mbështetje të sulmuesit të vetëm, Sadikut.
