Vetëm pak ditë pas përballjes për kampionatin maqedonas, që përfundoi në barazim 1-1, Vardari dhe Shkëndija do të përballen sërish sot në orën 14:00, në sfidën e parë çerekfinale, të Kupës së Maqedonisë.
Takimi do të startojë në orën 14:00 dhe do të luhet në stadiumin “Philipi II”, të Shkupit, ndërsa sfida pritet me mjaft interes dhe premton të jetë spektakolare.
Shkëndija është e shkëputur me 8 pikë në krye të renditjes në kampionat, ku titulli duket se do të kthehet në Tetovë këtë vit, por nuk ka ndërmend të dorëzohet as në Kupë dhe do të synojë një rezultat pozitiv që në takimin e sotëm.
Në 6 sezonet e fundit, kjo është hera e 5-të që Vardari dhe Shkëndija përballen në Kupën e Maqedonisë dhe bilanci flet dukshëm në favor të kuqezinjve. Në 4 herët e para, 3 herë është kualifikuar Shkëndija, ndërsa vetëm në sezonin 2014-2015 ka arritur të kualifikohet skuadra nga Shkupi.