Maurizio Sarri i është përgjigjur me të njëjtën monedhë komplimentave të Pep Guardiolës, disa orë para sfidës mes Manchester City-t dhe Napolit, për Champions League.
“Pas Sacchit, Guardiola është trajneri tjetër që ka bërë revolucion në futbol. Të përballesh me skuadrat e tij, është një sensacion edhe më i madh sesa kur u përballëm me Real Madridit. Ata luajnë shumë lart dhe ushtrojnë presing të vazhdueshëm, ndaj është e vështirë t’i përballosh”, tha trajneri i Napolit.
Sarri theksoi se nuk ka përgatitur asnjë strategji të veçantë për të përballuar anglezët, ndërsa pranoi se ky është takimi që vlen më pak në këto momente.
“Mendoj se ky është takimi që vlen më pak në këto momente. Që në fillim e kisha menduar që anglezët mund t’i fitojnë të gjitha takimet, ndërsa kualifikimi ynë nuk varet aspak nga përballja me ta. Nuk kam përgatitur asnjë strategji të veçantë, sepse në këndvështrimin tim, aspekti taktik është një masturbim i mendjes. Djemve u kam kërkuar që të aplikojnë lojën që ne dimë të luajmë, ndonse e di që do të jetë e vështirë ta bëjmë këtë”, u shpreh Sarri.