Koeçidenca është befasuese, por duhet të shërbejë edhe si një thirrje për të vazhduar në rrugën e fitoreve. Me suksesin e arritur përballë Teutës, në duelin direkt të mbijetesës, Vllaznia u ngjit në kuotën e 21 pikëve pas 20 javëve në kampionat, ekzaktësisht si një sezon më parë në këtë periudhë.
Diferenca ndërmjet këtij edicioni dhe atij të kaluar, është se aktualisht shkodranët u ngjitën në këtë kuotë pikësh pas dy fitoreve radhazi me Lushnjën dhe Teutën. Ndërkohë, përpara një viti, Vllaznia pësoi dy humbje rresht me Kukësin dhe Partizanin.
Ndryshimi lidhet edhe me faktin se deri në periudhën e fundit të shkurtit dhe fillimit të marsit të kaluar, kuqeblutë e shihnin veten në gjysmën e sipërme të renditjes, e madje kthyen si objektiv arritjen e kupave të Europës. Këtë herë, rreziku i rënies nga kategoria është real dhe synimi është shkëputja sa më e madhe nga zona e ftohtë.
Vazhdimësia e rezultateve pozitive është e vetmja mënyrë për të rikthyer qetësinë te Vllaznia dhe për të evituar një mbyllje të frikshme si ajo e një sezoni më parë, ku qëndrimi mes më të mirëve u vendos pas ‘finales’ së luajtur përballë Tiranës.
