Me 8 fitore radhazi, Valencia ka ‘fluturuar’ në vendin e dytë të renditjes, vetëm 4 pikë larg Barcelonës Kryesuese dhe po tregon një formë të shkëlqyer këtë sezon. Gjithsesi, skuadra e Marcelinos do të përballet me ‘testin e të vërtetës’, pasi do të presë në shtëpi pikërisht katalanasit.
Vendi i dytë, do të përballet me kryesuesit, në një sfidë që premton të jetë spektakolare, me Valencian që do të kërkojë të konfirmohet si pretendente dhe Barcelonën që do të tentojë shkëputjen në krye të klasifikimit.
Katalanasit kanë fituar 11 nga 12 sfidat e këtij sezoni dhe nëse marrin 3 pikët sot, do të shkojnë +7 nga vendi i dytë dhe do të ‘udhëtojnë’ të qetë drejt titullit kampion. Nga ana tjetër, Valencia ka sot edhe mbështetjen e 2 tifozëve special, pikërisht skuadrat e Madridit, që pasi fituan takimet përkatëse dje, presin ndalesat e Barcelonës, për të ngushtuar diferencën.
Takimi Valencia-Barcelona do të luhet në ‘Mestalla’, në orën 20:45 dhe do të transmetohet live në SuperSport 2.