Ndonëse ende nuk është bërë zyrtare, mediet pranë klubit të Interit raportojnë se përforcimi i parë për merkaton e janarit do të jetë mbrojtësi Alessandro Bastoni. Djaloshi 18-vjeçar është tashmë në pronësi të zikaltërve, i huazuar te Atalanta deri në qershor të 2018-ës, por të 2 klubet kanë vullnetin për ta ndërprerë këtë marrëveshje në janar.
Kështu, në ditët e para të janarit, Bastoni pritet të fillojë stërvitjen me ekipin e parë, nën urdhrat e Spallettit dhe do të jetë një alternativë e rëndësishme në këtë repart, pasi aktualisht në stol ka mbetur vetëm Ranocchia. Bastoni do të jetë i vetmi afrim në repartin e mbrojtjes, ndërsa në mesin e fushës, gjithçka lidhet me largimet.
Nëse Joao Mario vendos të lërë zikaltrit për ndonjë tjetër skuadër, atëherë do të synohet të afrohet një fantasist me cilësitë që Spalletti preferon. Reparti i sulmit është ai që pritet të mos ndryshojë, pasi krahas Icardit titullar, si alternative të tij mund të shërbejnë Eder dhe Pinamonti, ndërsa krahët janë të dubluar tashmë.
