Atmosferë e rënduar te Kukësi. E vështirë për t’u kapërdira humbja turpëruese me Lushnjën, që mban me valixhe në duar trajnerin serb, ndwrsa pritet të vendoset gjithçka në një takim me presidentin Gjici.
Numri një i klubit ka zbritur menjëherë pas ndeshjes në dhomat e zhveshjes ku ka patur një takim shumë të tensionuar me lojtarët, ndërkohë që trajneri Milinkoviç dhe stafi teknik kanë qëndruar jashtë me numrin 1 të klubit që u është drejtuar me tone të larta futbollistëve për atë paraqitje të papranueshme ndaj skuadrës së fundit të klasifikimit.
Furtuna te kampionët duket shumë pranë, madje e paevitueshme, ndërkohë që nga ora në orë pritet të zyrtarizohet fati i trajnerit. Milinkoviç i cili pritet t’i komunikojë Gjicit dorëheqjen, vështirë se mund të shpëtojë këtë here, me 3 disfata në 4 ndeshjet e fundit, vetëm 6 pikë në 6 takimet e fundit, janë padyshim një rendiment katastrofik për një skuadër që e nisi sezonin me synimin për të fituar gjithçka dhe në gjysmë të kampionatit shfaqet praktikisht e dorëzuar në luftën për titull.
Milinkoviç po dështon objektiv pas objektivi dhe trajneri ka pranuar se nuk ka arritur të transmetojë në skuadër idetë e tij. Për Kukësin janë orë vendimtare dhe topi ka ngecur në fushën e Gjicit.
