Në orën 16:00, në “Adem Jashari” të Mitrovicës, do të zhvillohet finalja e Digitalb Kupës së Kosovës mes Prishtinës dhe Vëllaznimit të Gjakovës, duel që do të ulë siparin e sezonit të futbollit kosovar. Një përplasje mes dy skuadrave që kërkojnë ta mbyllin në mënyrën më të mirë të mundshme këtë sezon, aq më tepër që deri tani nuk kanë arritur asnjë objektiv.
Vëllaznimi nuk mundi të siguronte qëndrimin në Vala Superligën e Kosovës, ndërsa Prishtina dështoi ta fitonte titullin kampion në takimin e fundit të kampionatit me Dritën e Gjilanit, madje doli nga kjo ndeshje me probleme serioze, që do t’i vuajë pikërisht në finalen e Digitalb Kupës.
Debatik Curri, Amend Dallku dhe Shqiprim Taipi nuk do të jenë nën urdhrat e Mirel Josës për arsye pezullimi, duke ua bërë disi më të vështirë kryeqytetasve arritjen e objektivit. Klubi gjakovar, një diti para finales ka dalë me një qëndrim zyrtar ku siguron vazhdimësinë e kryesisë aktuale, pavarësisht rënies, duke premtuar kthimin sa më parë të skuadrës në elitën e futbollit gjakovar. Sipas rregullores, Vëllaznimi, edhe nëse e fiton Kupën, nuk merr pjesë në Europa League, çka do të thotë se Prishtina e ka të sigurt angazhimin në këtë kompeticion europian, pavarësisht rezultat që finales.
