Ndërkohë që dëbora prej ditësh ka përfshirë Kosovën, klubet e Vala Superligës duket se kanë qenë të papërgatitur për të luajtur në terrene me dëborë. Kjo për faktin se disa prej tyre nuk dispononin topin e kuq, që është i detyrueshëm për t’u përdorur, kur luhet në terren me dëborë.
Në një emision sportiv në KTV, futbollisti i Gjilanit, Armend Thaçi tregoi se në sfidën ndaj Lirisë, gjetën një zgjidhje interesante, duke lyer topin me spraj të kuq.
“E lyem me spraj dhe e bëmë të kuq, ndërkohë që për fat e pati efektin deri në fund, pasi topit nuk i doli boja. Shyqyr që ka qëlluar boja origjinale”, u shpreh me humor Thaçi.
Po e njëjta zgjedhje është dhënë edhe në Llap, ku vendasit u ndeshën me Dritën, fakt që u pranua nga kapiteni i këtyre të fundit, Ardian Limani. “Edhe në Llap u lye topi me spraj, por për fat bora u shkri gjatë kohës që bëmë nxehjen dhe luajtëm me top të bardhë”, tha Limani.