Tashmë është një lajm i konfirmuar, Unai Emery duhet t’i bëjë llogaritë pa praninë e Neymar për të paktën 6 deri në 8 javë. 26-vjeçari, i dëmtuar në sfidën me Olimpique Marseille do të qëndrojë jashtë fushës së blertë thuasje 2 muaj për t’u rikuperuar nga dëmtimi në kavilje. Këtë herë lajmin e konfirmon vetë babai i lojtarit brazilian, i cili gjatë një interviste në vendlindje ka folur mbi gjendjen shëndetësore të sulmuesit të klubit francez.
“Vendimi për rikthimin e tij në fushë nuk i takon as lojtarit e aq më pak klubit. Janë mjekët specialistë ata që do të vendosin për një çështje të tillë. Do të konsultohemi me mjekun e Kombëtares Braziliane të Futbollit, i cili do të kryejë vizitat mjekësore në Paris. Më pas, bashkarisht, do të vendosim se kur mund të jetë sërish në gjendje për t’u rikthyer në organikë. Duhet të bëjmë maksimumin që Neymar të rikuperohet në 100% të formës ndaj dhe klubi i PSG e di mjaft mirë se nuk do ta ketë në dispozicion për të paktën 6-8 javë.
Ashtu siç publikon Marca, mjekët personalë të lojtarit brazilian e shohin dëmtimin më të rëndë nga sa e përshkruan në fillim mjekët e Parisit pas ndeshjes më Marsejën. Prandaj, gjasat që sulmuesi të jetë gati për takimin e kthimit në Champions me Realin e Madridit janë minimale, për të mos thënë inekzistente.
