Ramadan Ndreu i gëzohet pikëve por jo paraqitjes së skuadrës së tij. Kamza fitoi me shumë vështirësi 2-1 ndaj Lushnjës se vendit të fundit, një kundërshtar që trajneri i skuadrës nga periferia e kryeqytetit nuk e konsideron aspak të lehtë.
“Të gjitha skuadrat do ta kenë të vështirë të fitojnë kundër Lushnjës. Ata nuk kanë presion si të tjerët dhe këtë po e tregojnë të gjitha ndeshjet. Pësuam një gol aksidental dhe vetëm dy herë shkuam te porta në pjesën e parë. I ndjemë shumë mungesat e Fushtar dhe Arrabal. Kjo ishte një ndeshje e vështirë nga ana psikologjike, është vështirë t’i japësh skuadrës një implus ndaj të dobëtëve. E rëndësishme është që morëm tre pikë të vlefshme.”
Ndreu shpjegoi edhe arsyen se përse nuk festoi në rastin e golit të dytë që ishte ai i avantazhit për Kamzën.
“Jam i kënaqur me 2-1 por e kisha parashikuar, puna më e madhe gjatë javës ishte nga ana psikologjike. Lushnja luan mirë edhe pse s’ka pikë. Është e vështirë të bindësh lojtarët që s’ka ndeshje të lehta. Nëse nuk i jep vlerësimin e duhur, vuan si ne sot.Isha i emocionuar se e kisha shumë frikë këtë ndeshje, kam eksperiencë në këtë gjë. Në këtë sezon kemi zhvilluar dy ndeshje të dobëta, të dyja ndaj Lushnjës.”