Oklahoma City Thunder pësoi humbjen e dytë radhazi në po kaq ditë, pavarësisht se ka në përbërje Russel Wesbrook. 31 pikët, 10 asistet dhe 5 topat e rikuperuar nën tabelë nga 28-vjecari nuk mjaftuan për të shmangur disfatën ndaj Minnesota Timberwolves, që mundi të rrembente fitoren në sekondat e fundit, me vetëm 2 pikë diferencë, 113 – 115. Falë dyshes Towns-Wiggins (nga 27 pikë secili), Timberwolves morën avantazhin në mesin e periodës së dytë, por rrezikuan në minutën e fundit, pasi Thunder arritën të barazonin. Gjithsesi, baskebollistët e Minesota-s e ruajtën qetësinë sa për të shënuar koshin e fitores.
Los Angeles Lakers pësoi një humbje të papritur 112 – 119 në shtëpinë e saj ndaj New Orleans Pelicans. Të pranishmit në “Staples Center” prisnin suksesin e dytë radhazi të idhujve të tyre, por Pelicans morën kryesimin që në fillim, duke shkuar deri +22 pikë në periodën e dytë. Lakers, të udhëhequr nga Clarkson, që realizoi në total 24 pikë, iu afruan përmbysjes së madhe në periodën e katër, por New Orleans, me dy lojtarë në formë, Davis dhe Cousins, që shënuan respektivisht 27 dhe 22 pikë, fituan në fund me 6 pikë diferencë.
