Me golat e tij dikur ai udhëhiqte Interin drejt sukseseve të mëdha. Diego Milito ishte njeriu simbol i zikaltërve në sezonin 2009-2010, në të cilin Interi fitoi tripletën e famshme me Jose Mourinhon në stol. Tashmë i tërhequr nga futbolli “ El Principe”, flet si tifoz për Interin e Spallettit dhe për bashkëkombasin e tij Mauro Icardi. Milito ishte i pranishëm në shkallët e San Siros për të ndjekur derbin ndaj Milanit, sfidë në të cilën mbeti i kënaqur nga paraqitja e zikaltërve.
“Interi i këtij sezoni ka një grup solid dhe një pjesë të madhe të potencialit ende nuk e ka shfaqur. Tifozët mund të ëndërrojnë sërish pasi unë mendoj që kjo skuadër është e denjë për të fituar titullin”, theksoi fillish ish sulmuesi argjentinas. Përsa i përket Icardit i cila ka shënuar 9 gola në 8 ndeshjet e para të kampionatit, Milito shtoi: “ Mauro është një vrasës brenda zone, është i pandalshëm, di si të lëvizë dhe se kur duhet ta godasë portën, është e vështirë të bësh krahasime por më ngjan shumë me Hernan Crespon”.