Blerje prej më shumë se 200 milionë eurosh dhe një pritshmëri e madhe jo vetëm nga drejtuesit, por dhe tifozët e shumtë në këtë fillim sezoni, por Milani deri tani nuk i ka arritur pritshmëritë.
Megjithatë, në ndeshjen e mesjavës, në transfertën e vështirë ndaj Chievos, kuqezinjtë e drejtuar nga Montella treguan shenja “ringjallje”, duke marrë një fitore me rezultatin bindës 1-4.
Por nëse keni qenë të vëmendshëm, për t’u veçuar nga kjo ndeshje, për Milanin ishte goli i shënuar nga kroati Kaliniç. Të besuarit e Montellas realizojnë 43 pasime të sakta, para se mbrojtja e Chievos të humbte orientimin dhe sulmuesi kroat të dilte i lirë me portierin Sorrentino, të cilin e mposhti me lehtësi.
Në fakt, goli i Kaliniç më shumë duket se është shënuar nga Barcelona, nisur nga pasimet e shumta, por që tregon shenja jete për kuqezinjtë. Milani është zgjuar? Një përgjigje më të saktë mund ta merrni pas ndeshjes së të shtunës, në orën 18:00, kur kuqezinjtë do të jenë përballë kampionëve në fuqi të Juventusit!
