Administratori i deleguar i Manchester Citit, Ferran Soriano, që në vitet 2003-2008 ka mbajtur edhe postin e zëvendës-presidentit të blaugranave, shfaqet kategorik në deklaratën e tij, duke zbehur në mënyrë absolute idenë e transferimit të Lionel Messit në Premier League.
“E njoh e mjaft mirë personalisht yllin argjentinas dhe familjen e tij dhe jam i bindur se Barcelona është skuadra në të cilën ai duhet dhe do të vijojë të performojë magjishëm”, tha zyrtari i klubit anglez.
Në këtë mënyrë fjalët e Ferran Soriano vijnë si një mesazh që sigurojnë katalanët, pas spekulimeve mediake që e lidhin vazhdimisht të ardhmen e sulmuesit fenomenal me një transferim të mundshëm. Soriano siguron Barcelonën duke u shprehur se Barça duhet të jetë e qetë në këtë drejtim, pasi nuk ka asnjë mundësi reale që Messi të mbajë veshur një ditë fanellën e Manchester Cityt.
“Realisht nuk ka asnjë mundësi për të arritur shërbimet e Lionel Messit. Ekipi ynë do të vijojë të bëjë gjëra të mëdha, duke ndjekur rrugën e vet pa Lionel Messin dhe pse duhet thënë se as vitet që kalojnë nuk e zbehin shkëlqimin e këtij fenomeni, pasi ai është gjithnjë e më shumë në ngritje duke qenë se flasim për lojtarin më të mirë në botë, i aftë për të ndryshuar çdo gjë në mënyrën më pozitive të mundshme, me pak fjalë një gjeni”, deklaroi Soriano.