Javier Mascherano po kalon ditët e tij të fundit në Katalonjë, pasi me hapjen e merkatos dimërore, do të transferohet në Kinë, ku ka kërkesa të shumta. Nga ana tjetër, trajnerit Valverde do t’i shtohet një telash më shumë në repartin e mbrojtjes, ku po vuan mungesat e disa futbollistëve.
Pikërisht për këtë arsye, drejtuesit e Barcelonës kanë renditur si prioritet maksimal afrimin e një qendërmbrojtësi, pasi edhe francezi Umtiti nuk kthehet para muajit mars. Në krye të listët së dëshirave qëndron mbrojtësi holandez i Lazios, Stefan De Vrij, të cilit i skadon kontrata me bardhekaltrit në fund të sezonit dhe duket se nuk ka ndërmend ta rinovojë.
Lazio do të ishte e gatshme të hiqte dorë në janar, për të mos e humbur me parametra zero në verë, por katalanasit duhet të përballen me konkurrencën e Juventusit dhe Interit, që kanë avancuar në negociatat e tyre me holandezin.