Kapiteni dhe lideri i Borusias së Dortmundit, Marco Reus ka vendosur të qëndrojë përjetë te klubi gjerman. Ditën e sotme është arritur akordi dhe është firmosur rinovimi i tij me verdhezinjtë, teksa kontrata e re do t’i mbajë palët të lidhura deri në vitin 2023.
Për Reus, tashmë 29 vjeç, kjo mund të quhet edhe kontrata e jetës, pasi në vitin 2023 do të jetë 34-vjeçar dhe në hapat e fundit të karrierës.
Lajmi i rinovimit u bë i ditur nga vetë klubi gjerman, nëpërmjet një komunikate, teksa ende nuk dihet nëse është përfshirë ndonjë klauzolë për zhvlerësimin e saj. Ajo që dihet me siguri, është se shifrat e pagës së sulmuesit, janë përmirësuar ndjeshëm.