Fundjavën e kaluar, Lushnja ra matematikisht në Kategorinë e Parë, prej nga erdhi sezonin e kaluar, duke treguar se nuk ishte gati për të garuar mes më të mirave. Në këtë edicion, objektivi i vetëm që i ka mbetur klubit është promovimi i lojtarëve të rinj.
Trajneri Ilir Gjyla e ka nisur këtë projekt që në çastin kur morri drejtimin e verdhejeshilëve dhe do ta vijojë edhe në takimin e radhës ndaj Kamzës, ku pritet të aktivizojë nga minuta e pare lojtarë si Marko Çela, Marjus Koreshi dhe Armando Çela. Të tre këtë futbollistë shprehen të lumtur që po u ofrohet mundësia për të treguar aftësitë që disponojnë, në fushën e lojës.
Problemet e Lushnjës në këtë sezon të Superiores nisën nga starti i edicionit, megjithatë tashmë klubi po kërkon të evidentojë elementë që mund të jenë të dobishëm në Kategorinë e Parë dhe ka nisur të promovojë talentet brenda shtëpisë. Natyrisht që objektivi i lagunarëve për sezonin e ardhshëm pritet të jetë sërish rikthimi në Superiore dhe puna duket se ka filluar që tani.