Nuk ka paqe mes Mladen Milinkovic dhe Luftëtarit. Ka dështuar në fakt seanca e parë mes palëve në Dhomën e Zgjidhjes së Konlikteve që sic parashikon procedura konsiderohet si seanca e pajtimit ku synohet arritja e një akordi me ndërmjetësinë e përfaqësueshve të Federatës Shqiptare të Futbollit. Luftëtari në seancën e parashikuar paraditen e kësaj të marte ka qenë i përfaqësuar nga zyrtari i klubit Rigels Malile ndërsa trajneri serb është paraqitur i shoqëruar nga ish/zv trajneri i skuadrës gjirokastrite, Vasil Papa , aktualisht në rolin e përkthyesit të Milinkovic te Kukësi. Gjithsesi nuk ka patur vend për akord e madje as për bisedime mes palëve pasi Mladen Milinkovic ka paraqitur në Dhomën e Zgjidhjes së Konflikteve një shkresë nëpërmjet të cilës ka refuzuar negociatat duke i qëndruar pretendimit se ai është i lirë nga detyrimet konktraktuale me Luftëtarin. Në këtë mënyrë palët mbeten në llogore të kundërta pasi në klubin gjirokastrit i qëndrojnë pretendimit se trajneri serb ka qenë nën kontratë edhe për sezonin që pritet të nisë duke këmbëngulur në kërkesën e një dëmshpërblimi prej 100 mijë eurosh sic edhe te Luftëtari pretendojnë se parashikohet në kontratën e firmosur me trajnerin serb. Me konfliktin që mbetet i hapur tanimë procedura parashikon se Luftëtari i duhet të bëjë sërish një kërkesë për gjyq në dhomën e zgjidhjes së Konflikteve e cila do të përcaktojë dhe seancën e radhës e cila ndryshe nga e para do të jetë në formatin e një seancë gjyqësore ku organit në fjalë i duhet të vendosë përfundimisht mbi cështjen e Milinkovic me Luftëtarin.
