Fitorja ndaj Kamzës është një sinjal i mirë për skuadrën dhe drejtuesit e Luftëtarit, të cilët shohin “të lindë dielli” pas “stuhisë” së fortë që kanë përjetuar në javët e fundit. Gjirokastritët jo vetëm që marrin impulse pozitive në aspektin psikologjik, por sigurisht që vendosin nën presion edhe rivalët direkt në garën për mbijetesë. Gjithashtu lëshojnë sfidën ndaj çdo kundërshtari. Formacioni i Hasan Likës më në fund sheh që minutat e fundit t’i buzëqeshin pas një periudhe të gjatë kur kanë parë vetëm zhgënjim në fazën përmbyllëse të ndeshjeve. Laçi i barazoi në shtëpi pikërisht në minutën e fundit të kohës së rregullt, një ndeshje të cilën e nisën me një gol pa u ngrohur ende, Vllaznia i mposhti në “Loro Boriçi” me golin e Gilman Likës 7 minuta përpara fundit, ndërsa më herët në fazën e parë ishte pikërisht Kamza që i ndëshkonte në shtëpi me anë të Racicit në kohën shtesë me një penallti. Por tashmë rrjedha e fatit mer një tjetër drejtim, me bluzinjtë që arrijnë të gjejnë suksesin pikërisht në sekondat e fundit. Luftëtari, një skuadër që prodhon shumë lojë, është etiketuar si e pafat, edhe pse vetë trajneri Lika dhe futbollistët kanë pranuar që është çështje e mungesës së qetësisë në finalizim. Drejtuesit kanë theksuar që në janar përforcimet do të vijnë pikërisht në repartin e sulmit, por deri atëherë duhen përballuar në mënyrën e duhur dy ndeshje shumë të vështira, sfida në shtëpi me Partizanin dhe transferta në Kukës.
