Sabien Lilaj ishte sërish një nga më aktivët te Skënderbeu, duke ndihmuar skuadrën të marrë një fitore 2-0 në Vlorë dhe të sigurojë finalen e Kupës së Shqipërisë. Mesfushori korçar, që është pjesë edhe e kombëtares së Panuccit, tha për Sueprsport se ky është viti i duhur për Skënderbeun, që të çojë të dy trofetë në Korçë.
Mund të themi se ishit edhe pak me fat sot?
Ishte një ndeshje e vështirë dhe me shumë raste. Flamurtari kishte në avantazh edhe rezultatin e ndeshjes së parë, ndaj në pjesën e parë mund të them që u luajt një ndeshje e barabartë. Në të dytën patëm edhe pak fatin në anën tonë, por treguam më shumë këmbëngulje për t’u kualifikuar.
Besoni se mund t’i fitoni të dy trofetë?
Kemi gjithë vitin që e tregojmë se ky është viti i Skënderbeut. Kemi dominuar në kampionat, duke mposhtur të gjithë kundërshtarët direkt, ndërsa tani do të synojmë edhe Kupën, por duhet të qëndrojmë me këmbë në tokë, pasi Laçi është një ekip me eksperiencë në Kupë.
