Liçaj kthehet te Luftëtari, firma formalitet
Vetëm gjashtë muaj pas kalimit në Vlorë te Flamurtari, Lejdi Liçaj është gati të rikthehet te Luftëtari. Për shkak të mungesës së hapësirave te kuqezinjtë, mbrojtësi i djathtë vendosi të largohet nga ekipi i vendlindjes për t’u kthyer në Gjirokastër, aty ku ka kaluar një pjesë të rëndësishme të karrierës. 31-vjeçari ka gjetur akordin në parim me drejtuesit e Luftëtarit dhe për të finalizuar marrëveshjen mungon vetëm firma në kontratë. Gjithçka duket një formalitet, me Liçajn që do të bëhet përforcimi i nëntë i bluzinjve në merkaton e Janarit, ku mes goditjeve të mëdha janë edhe sulmuesi Vasil Shkurtaj, brazilianët Marko Aurelio e Xhekson Ferraira, si edhe ish-mbrojtësi i Flamurtarit, Ivan Jakovljeviç.
Me afrimin e Liçajt, skuadra e drejtuar nga trajneri Hasan Lika, mund të quhet e kompletuar, megjithatë drejtuesit e klubit refuzojnë ta cilësojnë merkaton të mbyllur. Edhe pse janë të bindur se kontingjenti është i kompletuar, në Gjirokastër lënë të hapur mundësinë për të tjera surpriza deri në mbylljen e afatit të transferimeve të dimrit. Pas paraqitjeve të shkëlqyera të skuadrës në javët e fundit të vitit të kaluar dhe përforcimet e kësaj periudhe, te Luftëtari besojnë se do të kthejnë ekipin në nivelin e sezonit të kaluar, me bluzinjtë që fituan në fushë vlerësimin si skuadra me futbollin më të bukur të kampionatit.