Më në fund Kukësi. Kampionët janë rikthyer dhe me stil madje. Jo për nga rezultati, jo për fitoren që arritën me përmbysje ndaj Teutës, por mënyrën sesi klubi po menaxhon një situatë të vështirë. Për herë të parë tek verilindorët presidenca ka vendosur që të mbajë me ngulm trajnerin, pavarësisht rezutlateve. Diferenca prej 9 pikësh me Skënderbeun kryesues ka bërë që në Kukës të mos jenë të qetë pasi objektivi për të ruajtur titullin largohet nga java në javë. Megjithatë qetësinë e munguar klubi ka ditur ta menaxhojë, presidenti Safet Gjici për herë të parë i ka hequr përgjegjësinë trajnerit duke e shpërndarë atë tek të gjithë, lojtarët dhe stafi drejtues. Një veprim që ka sjellë rezultat pasi tek kampionët në fuqi nuk mbizotëron kaosi, por të gjithë janë të përkushtuar për të kaluar këtë situatë dhe për t’iu rikthyer pretendimeve. Në tërë këto vite edhe presidenti gjici ka mësuar dicka, që me presion nuk mund të lihen pas krahëve ngërcet që të dhuron sezoni, por këtë radhë shton përgjegjësitë ndaj lojtarëve dhe mbi të gjitha ruan qetësinë. Ndaj Teutës u pa reagimi i duhur i skuadrës, që pavarësisht disavantazhit arriti tek fitorja pas dy humbjeve radhazi, duke dëshmuar se qetësia është arma më e mirë për të kaluar një krizë në rezultate dhe lojë.
