Kosova në basketboll për meshkuj pësoi humbjen e dytë në po kaq takime në grupin C kualifikues për Botërorin “Kinë 2019”, pasi u mposht në Debrecen nga Hungaria me rezultatin 84-76. Edhe këtë herë Kosova rezistoi për vetëm një pjesë teksa e mbylli fraksionin e parë në avantazhin e një pikë, por në fund u dorëzua pa kushte përballë hungarezëve. Ashtu si ndaj Lituanisë në ndeshjen e parë në grup edhe në sfidën ndaj Hungarisë më të mirët mbi parket për Kosovën ishin Dardan Berisha dhe amerikani i natyralizuar kosvar Scott Bamforth. I pari realizoi 22 pikë ndërkohë që Bamforth i ndihmoi të tijët me 21 pikë 4 asiste dhe 5 rebound. Ndeshjen e radhës Kosova do ta ketë ndaj Polonisë në transfertë. Edhe pse pozicionohet e fundit në grupin C, skuadra e trajnerit Brad Greenberg ka shanse për të kualifikuar në ruandin tjetër pasi deri në fund të eliminatoreve do të zhvillojë dhe 4 ndeshje dhe 3 të parat e grupit avancojnë më tej.
