Trajneri i Lazios vijon të jetë mjaft i zhgënjyer me vendimet e arbitrit Giacommeli në sfidën e të hënës ndaj Torinos. Simone Inzaghi premton se skuadra është gati ta kthejë padrejtësinë në forcë dhe të arrijë objektivat.
“Jemi gati ta rikthejmë padrejtësinë në forcë, duke filluar që nga sfida e Kupës ndaj Cittadellas, një skuadër mjaft simpatike e Serisë B. E gjithë bota e pa se çfarë ndodhi të hënën në mbrëmje, por edhe në raste të tjera, gjithsesi nuk do të na ndalin””, tha Inzaghi.
Trajneri i bardhekaltërve tha se Immobile do të luajë në Kupë, pasi nuk do jetë i disponueshëm në javën e ardhshme në kampionat, ndërsa bëri thirrje për kujdes.
“Sfida Inter-Pordenone na tregoi se duhet të vlerësojmë maksimalisht çdo lloj kundërshtari, ndaj të përqendrohemi maksimalisht te Cittadella. Immobile do luajë titullar, ndërsa për pjesën tjetër nuk e kam vendosur akoma”, u shpreh trajneri i Lazios.