Ku ka “humbur” Romelu Lukaku? Sulmuesi që u konsiderua si blerja me efektive në merkaton e verës për “Djajtë e Kuq”, pas atij starti të furishëm të sezonit, nuk po i vlen shumë Manchester United në ndeshjet e fundit. Përkundrazi, në derbin me Manchester City-n, të humbur 1-2, u bë protagonist negativ me dy gabime që rezultuan fatale, sepse në të dy këto raste “Cityzens” realizuan dy gola me David Silvan dhe Otamendin.
Deri tani Lukaku ka realizuar 8 gola në 16 ndeshje në Premier League, por në 12 nga 14 ndeshjet e fundit nuk e ka gjetur rrjetën. Prania e tij tek United u mendua se do të rrezikonte madje edhe të ardhmen e Zlatan Ibrahimovic. Sulmuesi i kombëtares belge madje ashtu siç ka bërë sezonet e fundit, nuk u ka shënuar dot 6 skuadrave të para të renditjes. Mourinho vazhdon të besojë tek ky futbollist, që në 58% të goditjeve në portë është i saktë, por që në kombinimet me shokët e skuadrës lë shumë për të dëshiruar, sepse 33% të pasimeve i ka të gabuara.