Lewis Hamilton ka regjistruar kohën më të shpejtë në sesionin e parë të provave të lira, të garës së Austin, në Shtetet e Bashkuara të Amerikës. Britaniku përfundoi xhiron me 1.36.355, ndërsa la pas rivalin e tij, pilotin gjerman të Ferrarit, Sebastain Vettel, me një diferencë prej 0.593 të mijtat më shpejt.
I treti u rendit piloti tjetër i Mercedes, Valteri Bottas, ndërsa pas tij u rendit piloti i Red Bull, Max Verstappen. Vetëm vendi i 7 për pilotin tjetër të Ferrarit, finlandezin Kimi Raikkonen, ndërsa Ricciardo e mbylli këtë sesion në vendin e 16, për shkak të problemeve teknike.
Ky session u dominua nga një mot jo i qendrushëm, që shkaktoi pasiguri në zgjedhjen e gomave që u përdorën. Provat zyrtare të çmimit të madh të Austinit do të zhvillohen nesër në orën 21:00, ndërsa gara do të zhvillohet të dielën, në të njëjtën orë.
Formula 1 kryesohet nga piloti britanik i Mercedes, Hamilton, që ka një diferencë prej plot 59 pikësh nga gjermani Vettel, kur kanë mbetur edhe 4 gara nga fundi. Hamilton ka fituar 4 nga 5 garat e fundit të zhvilluara në pistën e Austinit, në Shtetet e Bashkuara.