Gennady Golovkin konfirmohet tmerri i rivalëve për peshat e mesme në boks. 36-vjeçari nga Kazakistani mposhti me Knock-out në raundin e dytë amerikanin me origjinë armene Vanes Martirosyan, i cili u zgjodh të duelonte me Golovkin pas pezullimit të Canelo Alvarezit për përdorim të substancave të ndaluara. Në ringun e Carsonit, pranë Los Amgelesit u zhvillua një duel pa histori, pasi Golovkin (38 fitore dhe 1 barazim) u shfaq superior ndaj rivalit të tij në në ring, duke e hedhur shumë shpejt në tapet.
Pas një raundi të parë pa shumë ritëm dhe emocione, ku Martirosyan u duk se ishte përgatitur mirë, Golovkin u shfaq prepotent duke mbyllur në të dytin llogaritë. Një e djathtë e fortë e çorienton rivalin, që nuk arrin të reagojë dhe pas disa goditjeve radhazi të kazakut përfundon në tapet, duke mos u ngritur më edhe pse gjyqtari numëron deri në 10. Për Martirosyan kjo është humbja e katërt në karrierë (ka edhe 36 fitore e 1 barazim).
Golovkin, me këtë sukses mbron titujt kampion në WBA, WBC dhe IBF.
Në Londër, në sfidën e peshave të rënda mes dy ish-kampionëve të botës, Tony Bellew fitoi ndaj David Haye me “ko” teknik, kur kronometri tregonte 2 minuta e 14 sekonda në ruandin e pestë, duke i treguar njëkohësisht rivalit të tij rrugën për t’u tërhequr nga boksi. Para se arbitri ta ndalte ndeshjen, Bellew, 35-vjeçar, e kishte hedhur 3 herë në tokë 37-vjeçarin, që në 2009-ën mbante brezin e WBA. Për Haye kjo ishte disfata e 4-ët në 32 ndeshje, për Bellew është fitorja e 39-të në 33 duele të zhvilluara. “Tony ishte më i mirë,” – pranoi Haye pas ndeshjes. Vështirë se do ta gjejë sërish përballë në ring.