Manchester United vuajti jo pak me Brightonin, por gjithsesi arriti të merrte maksimumin e pikëve ndaj këtij kundërshtari në “Old Trafford”. Edhe pse diferencat në emra dhe cilësi ishin të ndjeshme, “Djajtë e Kuq” e zhbllokuan me shumë vështirësi takimin në minutën e 66-të me Ashley Young, i ndihmuar në goditjen e tij nga jashtë zonës nga devijimi i një mbrojtësi, që nuk i dha asnjë mundësi reagimi portierit mik. Një fitore më shumë rëndësi për skuadrën e Jose Mourinhos që e ngushton të paktën përkohësisht në 5 pikë diferencën me Manchester City-n, që luan të dielën në transfertë me Huddersfieldin. Barazim i papritur mes Tottenhamit dhe West Brom në stadiumin “Wembley”. Rondon shënoi për miqtë që në minutën e 4-t, ndërsa Harry Kane barazoi pas shumë përpjekjesh në të 74-ën.
Në takimet e tjera të së shtunës Newcastle United u mposht 0-3 nga Watfordi, Crystal Palace – Stoke City përfundoi 2-1, ndërsa Swansea – Bournemouth 0-0.