Trajneri i Vllaznisë, Ernest Gjoka u shfaq mjaft i zhgënjyer për atë barazim pa gola kundër Kamzës, që ka ndërlikuar pozitat e shkodranëve në renditje, pasi tashmë janë me një këmbë në Kategorinë e Parë.
Një tjetër barazim, por këtë herë nuk ju kënaq aspak…
Nuk na vlente ky barazim dhe jemi shumë të dëshpëruar që nuk ia dolëm të fitonim sot. Tani nuk na mbetet gjë tjetër veçse të japim maksimumin në ndeshjet e mbetura dhe të shpresojmë që kundërshtarët do të rrëshqasin. Menduam të gjenim golin në pjesën e parë, por nuk ia dolëm dhe u futëm në nervozizëm për minutat e mbetura në pjesë ne dytë. Natyrisht që kjo nuk na ndihmoi të ishim të kthjellët në ato raste që na u paraqitën.
Mendoni se ndikon mungesa e një presidenti?
Ndoshta edhe ndikon, por nuk është momenti për të bërë një debat të tillë kaq të madh, për më tepër në këto momente. Kemi të tjera përparësi dhe duhet të mendojmë çfarë do bëjmë me skuadrën, jo të futemi në një debat të tillë.