Mbrojtësi algjerian i Napolit, Faouzi Ghoulam mund të konsiderohet vërtetë një nga futbollistët më të pafat. Anësori që e nisi këtë sezon në superformë, duke u shndërruar në protagonist te Napoli, pësoi një dëmtim në sfidën ndaj Manchester Cityt, për Champions, që e mbajti larg për disa muaj.
Kur dukej se çdo gjë kishte kaluar dhe Ghoulam po punonte me grupin, mbrojtësi ka ndjerë një shqetësim në gjurin e djathtë dhe menjëherë ka udhëtuar për në Romë, te mjeku që ndiqte dëmtimin.
Vizitat kanë konfirmuar një dëmtim të rëndë dhe Ghoulam iu nënshtrua menjëherë një tjetër operacioni, që pritet ta mbajë larg rreth 12 muaj, referuar rasteve të ngjashme.
Mbrojtësi i majtë algjerian kishte tërhequr vëmendjen e shumë klubeve të mëdha, ndërsa holandezi Mertens, e quajti ‘blerjen’ më të mirë për Napolin, për pjesën e mbetur të sezonit.