Milani nuk fiton prej 5 takimesh radhazi në Serinë A dhe takimi I nesërm në mbrëmje, përballë Beneventos shikohet si ideali për t’u rikthyer te suksesi. Skuadra e Gattusos do të presë në ‘San Siro’ skuadrën e parë që ka siguruar rënien në Serinë B dhe 3-pikëshi është detyrim për kuqezinjtë, që të ruajnë pozitat në zonën Europa League. Vetë trajneri i Milanit, Genaro Gattuso bëri thirrje për përqendrim, pasi ndaj Beneventos nuk do të jetë aq e lehtë sa duket në letër.
“Benevento ka shumë element të mirë në përbërje dhe duhet të bëjmë kujdes. Për të fituar duhet të respektojmë kundërshtarin dhe të japim maksimumin në fushë, pasi Benevento luan e qetë dhe mund të surprizojë në çdo moment”, tha Gattuso.
Trajneri i Milanit tha se gara për Europa Leaguen do të jetë vërtetë shumë e vështirë, pasi përveç kuqezinjve, janë edhe 4 skuadra të tjera që e synojnë këtë pozicion.
“Përveç nesh, në garë për një vend në zonën europiane janë edhe Atalanta, Fiorentina, Sampdoria dhe Torino, ndaj për t’ia dalë, nesër duhet të marrim maksimumin. Sa i përket formacionit, do të më duhet të verifikoj fillimisht gjendjen e Calabrias dhe Calhanoglusë, ndërsa më pas do të vendos”, deklaroi Gattuso.
Sa i përket sezonit të ardhshëm dhe merkatos, Gattuso duket se i ka idetë e qarta. Ai nuk kërkon ndryshime rrënjësore, por 3-4 afrime cilësore, që do të shtonin kualitetin në skuadër.
“Sa i përket merkatos, nuk besoj se ka nevojë për revolucion, por për afrimin e 3-4 lojtarëve, që mund të na shtonin cilësinë dhe konkurrencën. Nuk dua të përmend emra, pasi më parë duhet të bisedoj me drejtuesit e klubit. Por, po të ishte në dorën time, do të preferoja Pogbanë, Cristiano Ronaldon dhe Messin”, tha me humor Gattuso.
